«Иры Стыр Ныхас»-ы сæрдар Кучиты Руслан æмæ йæ хæдивджытæ Еналдыты Хъазыбег æмæ Дзæгъойты Вячеславы хъæпп æрисæй арæзт æрцыд цæлхæмбырд республикæйы æхсæнадон змæлдтæ æмæ организациты сæргълæуджытимæ ахсджиаг фарстаты фæдыл.

Мадзалы сæйраг нысан уыд кæрæдзийы хæстæгдæр базонын æмæ иумæ, уæхски-уæхск æрбалæугæйæ бакусын ирон æвзаг, культурæ æмæ традицитæ бахъахъхъæныныл. Æмбырды архайæг æхсæнадон змæлдты минæвæрттæ кæрæдзийæн радзырдтой сæ куысты нысантæ æмæ сыл куыд кусынц, уый.

Кучиты Руслан йæ раныхасы загъта: – Æрмæст Цæгат Ирыстоны регистрацигонд ис 800 æхсæнадон организацийæ фылдæр. Уыдон сæ размæвæрд нысан у республикæйы экономикон-социалон рæзтыл ахадыны, Цæгат Кавказы цæрæг адæмыхæттыты 'хсæн хæлардзинад æмæ сабырдзинад тауыны. Уыдонæй алы организаци дæр ацы фарстатæм, æнæмæнг, хæссы йæхи æвæрæн. Фæлæ нæ хъарутæ куы баиу кæнæм, уæд нын фылдæр бантысдзæн саразын.

Сараздзыстæм иумæйаг программæ нæ дарддæры куыстæн. Иумæ нæ куыст дæр уыдзæн хæрзхъæдджындæр, æмæ не 'хсæн хæлардзинады ахастдзинæдтæй рантысдзæн ахсджиаг мадзæлттæ, кæцытæ хъуамæ хорзæрдæм сахадой нæ размæвæрд нысантыл. Мадæлон ирон æвзаг æмæ культурæ бахъахъхъæныныл мах хъуамæ бакусæм лæмбынæг, фæсарæйнаг, уырыссаг æвзаг æмæ культурæ зонын дæр куыд нæ фæцуда. Фæсивæдимæ куысты стыр ахъаз фæуыдзæн бинонты 'хсæн ахастдзинæдты институт.

Бæлвырд куы у, Ирыстоны демографион уавæр зæрдæхсайгæ кæй у, уый. Уымæн та йæ фыццаг аххоссаг у фæсивæд бинонты хъуыддаг кæй нæ кæнынц, сæ цард сæ чи баиу кæны, уыдонæй та бирæтæ цыбыр рæстæджы фæстæ кæй ахицæн вæййынц, уый дæр. Уый ууыл дзурæг у æмæ бинонты 'хсæн фаг нæ цæуы ныхас æмæ куыст царды ацы ахсджиаг хъуыддагмæ сæ бацæттæ кæныныл. Кæронбæттæны æмбырды архайджытæ иу оганизацийæ фæстæмæ сæ къух бафыстой сæ дарддæры æмгуыстады разыйы нысанæн.

ХЕТÆГКАТЫ Оксанæ

IMG 2131

IMG 2139

IMG 2141

IMG 2158

 
Наверх

 

Яндекс.Метрика