bestaevaДзæнæтыбадинаг Чеджемты Æхсар ацы ныхæстæ куыд аив æмæ рæсугъд загъта, уымæн æвдисæн - сæ арф хъуыды. Æцæгæйдæр, нæ абоны царды Æхсары хъуыдытæн ис стыр бынат, уымæн æмæ хорз, дæнцæгджын хистæр цы кæстæртæн уа, уыдонæн уый сæ амонд вæййы.

Ацы æмдзæвгæйæ ист ныхæстæ цы бафæзминаг хистæртæм хауынц, уыдонæй иу у Æппæтдунеон æхсæнадон змæлд «Иры Стыр Ныхас»-ы Рахизфарсы районы хайады сæрдар Томайты Алиханы фырт Савелий.

Æвæццæгæн, Хуыцау адæмы куы сфæлдисы, уæд се 'хсæн разыны ахæмтæ, сæ удыхъæд хуыздæр æмæ æнæаиппдæр миниуджытæй фидар кæмæн вæййы; сæ миддуне, сæумæйы æртæхы гагайау, æнæхин, рæсугъд æмæ ирддæр ахорæнтæй дзаг кæмæн вæййы, сæ фыццаг бакастæй та бæрæг фæдары сæ зæрдæйы æгæрон хæлардзинад, адæммæ фæкæсынц цæстуарзонæй...

Уæдæ, ахæм хуыцауысконд адæймаг æмæ фæрнджын хистæрыл æз нымайын Томайы-фырты дæр. Куы йын аргъ кæнæм хуымæтæг адæймаджы цæстæнгасæй, уæд, мæнмæ гæсгæ, йемæ зонгæ чи у, уыдон æнæмæнг бузныг уыдзысты хъысмæтæй. Нæ абоны мылазон царды Савелийы хуызæн адæм, раст æхсæвы тары цырагъы рухс куыд у, афтæ сты. Мæнгарддзинады уылæнтæ ныссæттын хъом у, уымæн æмæ йæ риуы арфы цæры хæлар зæрдæ. Кæд ныры дуджы козбаудзинады ныхмæ иуæй-иу адæм æдых разындысты, уæддæр, Савелийы уды цы уарзондзинад цæры цардмæ, уый тыхджындæр цы кæны, æндæр ын лæмæгъ уæвæн нæй.

Мæнæн тынг æхсызгон у, мæ цардвæдыл мæ Хуыцау ахæм адæмыл кæй сæмбæлын кодта. Зæгъæм, ÆÆЗ «Иры Стыр Ныхас»-ы уæнгты æхсæн уæвгæйæ, мæ зæрдæйы фегуыры цавæрдæр æнахуыр, уæлмонц сæрыстырдзинад, растдæр зæгъгæ йæ мæ сæрбæрзонддзинадыл ноджы бафты æмæ, цыма, иннæтæм уæлхохæй фæкæсын... Уый æвзæр у æви нæ, уымæн мæ бон дзуапп раттын нæу, фæлæ æз сæрбæрзонд вæййын нæ районы Ныхасæн ахæм сæрдар кæй ис, уымæй.

Уæдæ, Томайы-фыртмæ æххуысагур, зондагур бацыдтæ, уæд дæхи æрцæттæ кæн лæмбынæг хъусынмæ. Уымæн æмæ кæддæриддæр йæ алы зондамынд, йæ алы ныхасы дæр вæййы уый бæрц мидис, æмæ дæ разы, цыма, дунейы энциклопеди ис æмæ дын сæ уый дзуры, афтæ фæкæсы адæймагмæ.

Бæргæ хорз уаид Савелийы хуызæн хистæртæ нæм чысыл фылдæр куы уаид. Томайы-фырт адæмы арфæйæ хайджын чи фæци, уыдонмæ хауы. Дæ кад, де 'гъдауæй, дæ уæздан ныхасæй, дæ лæгдзинадæй адæмы зæрдæтæм фæндаг скæн, уый алкæй къухы не 'фты. Фæлæ йæ бæстæйы хорзæхæн чи райгуырд, йæ адæмы амондæн чи цæры, раст Савелийау, уыдон æгас дзыллæйæн дæр вæййынц уарзон æмæ зынаргъ.

Нæ районы цæрджытæ хъуамæ уæлдай сæрыстыр уаиккой, ахæм хистæр нæм кæй ис, уымæй. Мæн та уырны, Томайты Савелий цы æхсæнад, цы кæстæртæн ис, уыдонæн кæй ис стыр дæнцæг æмæ ахæм хистæры фæзмынгæйæ сæм кæй æнхъæлмæ кæсы рæсугъд фидæн!

Савелий, Рахизфарсы районы æмæ æгас Ирыстоны кæстæрты номæй дын зæгъын стыр бузныг! Æнæнизæй, æнæмастæй ма нын бирæ къорд азты дæргъы хистæриуæг кæн! Махæн та Хуыцау ахæм хорзæх радтæд, цæмæй дæу хуызæн хистæртæн кæстæриуæг кæнын хъом уæм!

Бестауты Аланæ

 
Наверх

 

Яндекс.Метрика