Наша задача - сближение и сплочение всех осетинских диаспор и землячеств.

Посетителям сайта

Опыт старших – бесценный дар, он служит нам не одно тысячелетие...

Обращение к соотечественникам

Кæфты мæйы (октябры), 27-28 бонты, Дзæуджыхъæуы Хæххон-аграрон университеты культурæйы галуаны куыста ирон адæмы æнæрадон, IX-æм съезд. Амыдта йæ «Иры стыр ныхас»-ы Координацион советы сæрдар Кучиты Руслан.

Съезд æрæмбырд кодта æппæтдунейы ирон адæмы минæвæртты, æмтгæйæ, 537 делегаты (æвзæрст æрцыдысты 550), 147 хуынд адæймаджы (хуынд уыдысты 160), журналисты, газет, телеуынад æмæ радиойы æндæр кусджыты. Съезды архайдтой РЦИ-Аланийы сæргълæууæг Битарты Вячеслав, Республикæ Хуссар Ирыстон-Паддзахад Аланийы президент Бибылты Анатоли, дыууæ республикæйы хицауæдты æмæ парламентты сæрдартæ, Мæскуы, Санкт-Петербург æмæ Уæрæсейы æндæр регионты диаспорæты, хæстæг æмæ дард фæсарæйнаг диаспорæты сæрдартæ.

Съезд равзæрста кусгæ оргæнтæ, сфидар кодта боны фæтк. Ныхасы бар лæвæрд æрцыд РЦИ-Аланийы сæргълæууæг Битарты Вячеславæн. Фысымты æмæ йæхи номæй Битары-фырт раарфæ кодта съезды делегаттæн, æппæт ирон адæмæн, цæмæй æмбырд ацæуа кадджын уавæры æмæ сфидар кæна ахсджиаг уынаффæтæ, кæцытæ «Иры стыр ныхас»-ы ног æвзæрст актив æххæст кæна Ирыстоны æхсæнадон куыст райрæзыны тыххæй, æмæ æппæт адæмы цард фæхуыздæр кæныныл.

Дзуаппон доклад скæнынæн ныхасы бар лæвæрд æрцыд «Иры стыр ныхас»-ы Координацион советы сæрдары хæдивæг, профессор Æлборты Иванæн.

Делегаттæн фехъусын кодтой, съезды номмæ цы арфæйы телеграммæтæ æрвыст æрцыд, уыдон. æндæрты ‘хсæн телеграммæтæ æрæрвыстой Цæгат Ирыстоны ивгъуыд рæстæджы сæргълæуджытæ: Дзасохты Алыксандр æмæ Мамсыраты Таймураз, Уæрæсæйы паддзахадон Думæйы депутаттæ Мæхъиты Зураб, Таймазты Артур æмæ Тайсауты Хъазыбег, Гуырдзыйы ирон диаспорæйы сæрдар Плиты Георги, æмæ æндæртæ.

Ныхасы бар лæвæрд æрцыд «Иры стыр ныхас»-ы Координацион советы сæрдар Кучиты Русланæн, кæцы йæхимæ райста ахсджиаг хæс – Змæлды дарддæр архайды рахæцæнтæ раиртасын. «Нæ æхсæнады раз ис ахæм ахсджиаг фарстатæ – ирон æвзаг æмæ ирондзинад бахъахъхъæнын, ирон адæмы иудзинадыл лæмбынæг акусын, мыггæгты ахадындзинад уæлдæр сисын, цæмæй биноныгдæр кæсой фæсивæды ирон хъомылады фарстатæм. Уыцы куыст аккаг æвæрд куы ‘рцæуа, уæд Ирыстоны сомбонæн тас ницæмæй у» – бахахх кодта Кучийы-фырт.

Делегаттæ байхъуыстой ревизион къамисы сæрдар Хоситы Барисы дзуаппон докладмæ.

Докладты фæдыл пренитæ райдыдта Хуссар Ирыстоны хайады сæрдар Гаглойты Роберт.

Фыццаг бон съезды трибунæйæ прениты раныхас кодтой: Стамбулы ирон æхсæнад «Алан»-ы сæрдар Хъуысаты Садриттин; Координацион советы уæнг, РЦИ-Аланийы парламенты депутат Уататы Зелим; æрыдоны районы Ныхасы сæрдар Агънаты Георги; Украинæйы (Днепропетровскы) ирон диаспорæйы сæрдар Битъиты Эльбрус; сылгоймæгты организацитимæ кусыны комитеты сæрдар Махъоты Иринæ; æрæфы районы Ныхасы сæрдар Хасцаты Тазрет: Рахизфарсы районы Ныхасы сæрдар Томайты Савели; Координацион советы уæнг Томайты Шамил; Свердловскы областы ирон диаспорæйы сæрдар Гаглойты Лианæ; Дыгуры районы Ныхасы сæрдар Дзагуырты Атарбег; Воронежы ирон диаспорæйы сæрдар Бестауты Уырызмæг; Горæтгæроны районы Ныхасы сæрдар Ходы Æхсар.

Дыккаг бон пренитæ райдыдта Республикæ Хуссар Ирыстон-Паддзахад Аланийы президент Бибылты Анатоли. Йæ раныхасы кæроны адæмæн фехъусын кодта йæхи уынаффæ – зонады сгуыхтдзинæдты фæдыл сахар Ярославлы националон-культурон ассоциаци «Алани»-йы сæрдар Дадианты Тамарæйæн кады ном «Республикæ Хуссар Ирыстоны зонады сгуыхт архайæг», зæгъгæ, лæвæрд кæй ‘рцыди, уый тыххæй.

Дыккаг бон съезды трибунæйæ прениты раныхас кодтой: Уæрæсейы Федерацийы советы уæнг Фадзайты Арсен; паддзахадон Думæйы депутат Таймазты Артур; Мæскуыйы ирон диаспорæйы сæрдар Уртаты Бексолтан; мыггаджы Ныхасы сæрдар Тургиты Эльбрус; ЦИПУ-йы ахуыргæнæг Цгъойты Тамерлан; Канадæйы (сахар Торонто) ирон диаспорæйы сæргълæууæг Мæргъиты Инал; Мæздæджы районы Ныхасы уæнг Бæзиаты Ларисæ; Цæгат-Ныгуылæн районы Ныхасы советы уæнг Магкаты Владимир; Санкт-Петербургы ирон диаспорæйы советы уæнг Засеты Иван; Украинæйы (Запорожаг областы) ирон диаспорæйы сæрдар Хъæрджынты Заурбег; Алма-Атайы этно-культурон центр «Ирныхас»-ы сæрдар Багаты Джульеттæ; Эверестмæ дыууæ экспедицийы скæныны сæйраг тренер æмæ сæрдар Хæмыцаты Хъазыбег; мыггаджы Ныхасы сæрдар Касаты Аслæнбег; Алагиры районы Ныхасы советы уæнг Цогойты Майрæм; Мæздæджы районы Ныхасы сæрдар Гуццаты Фридон; Кæсæг-Балхъары Ирон националон-культурон центр «Ныхас»-ы сæрдар Сугкойты Рамазан; Дзæуджыхъæуы Ирыстойнаг районы Ныхасы советы уæнг Сопойты Юрий.

Ууыл съезд сразы ис, цæмæй пренитæн кæронбæттæн конд æрцæуа.

Уынаффæйы проект бахæссыны бар лæвæрд æрцыд съезды делегат, Дзæуджыхъæуы 13-æм скъолайы сæргълæууæг Сæлбиты Иринæйæн. Съезд уынаффæ сфидар кодта.

Дарддæр, боны фæткмæ гæсгæ, съезд райдыдта æвзарын «Иры стыр ныхас»-ы кусгæ оргæнтæ.

Координацион советы нымæц фидаргонд æрцыд 81 адæймагæй. Раздæры нымæцимæ æбаргæйæ, фæкъаддæр 1,5 хатты бæрц. Персоналон нымæц дæр æвзæрст æмæ фидаргонд æрцыд.

Æвзæрст æрцыдысты Ревизион къамисы уæнгтæ дæр.

Съезд сфидар кодта Сидт Уæрæсейы президент Владимир Путинмæ.

Тæккæ активон æхсæнадон архайджытæн лæвæрд æрцыд майдантæ, Кады гæххæттытæ. Хæрзиуджытæ лæвæрдта Кучиты Руслан.

Ууыл боны фæтк уыд æххæстгонд.

Фæлæ кæрæдзийæн фæндараст зæгъыны размæ, делегаттæ Кучийы-фырты разамындæй, ныззарыдысты. æмæ Къостайы æмдзæвгæмæ гæсгæ: «Цæйут, æфсымæртау, раттæм нæ къухтæ абон кæрæдзимæ, Иры лæппутæ!», зæгъгæ, заргæйæ, кæрæдзийы къухтæ райстой. Æмæ уыцы кадджын, зæрдæмæцæугæ уавæры кæронмæ ахæццæ кодтой съезды куыст, кæцыйы фыццаг ныхасæй фæстагмæ фæцархайдтой ирон æвзагыл æмæ ирон æгъдаумæ гæсгæ.

Съезды хæдфæстæ ног æвзæрст Координацион совет æрæмбырд йæ фыццаг æрбадтмæ. Координацион советы сæрдарæй ногæй æвзæрст æрцыд Кучиты Алыксандрыфырт Руслан.

Ариаг СИДАМОН

 
Портал органов власти РСО-А
Правительство Южной Осетии
Совет соотечественников
Наверх

 

Яндекс.Метрика