Хорз адæм!

Дыууæ мæйы размæ Иры Стыр Ныхас рахаста уынаффæ ног хæрзиуæг (орден) «Адæмы Хорзæх» саразыны тыххæй. Куыд зонæм афтæ, абон Ирыстоны ис бирæ хæрзиуджытæ, кæцытæ арæхдæр дæттынц сгуыхт æмæ кадджын адæмæн.

Исджи бафæрсдзæн, ноджы ма нæ иу хæрзиуæг цæмæн бахъуыди, зæгъгæ. Уыцы фарстæн дзуапп дæттынц ацы орденæн йæ Уагæвæрды сæйраг домæнтæ:

        • Орден «Адæмы Хорзæх» у æппæтбæрзонддæр æхсæнадон хæрзиуæг, кæцы лæвæрд цæудзæн Ирыстоны адæмæн уæлвæткон лæггад чи бакодта, ахъаззаг кад æмæ намыс ын чи æрхаста, æрмæстдæр ахæмтæн. 
        • Хæрзиуæг раттыны курдиат æрбадæттыны бар ис Иры Стыр Ныхасы районты хайæдтæм, стæй Иры Мыггæгты минæвæртты Ныхасмæ.
        • Хæрзиуæг раттыны фарста хаст цæуы адæмы размæ хъæлæс кæнынмæ. Ууыл бакусдзысты районты Ныхасы æвзæрст лæгтæ, кæцытæ уардзысты адæмæн сæрмагонд формæтæ хъæлæс кæнынæн. Алкæмæн уыдзæн фадат схъæлæс кæнын интернеты дæр.
        • Æрфарсты бæрæггæнæнтæ бахынцыны фæстæ, сæ бындурыл Иры Стыр Ныхасы Координацион Совет хæсдзæн, кæмæн раттын хъæуы хæрзиуæг, уый фæдыл кæронбæттæны уынаффæ.
        • Цæвиттон, ацы орден, иннæтæй хъауджыдæр, æцæгæй у адæм сæхæдæг кæуыл уынаффæ кæнынц, ахæм хæрзиуæг. Уымæн æй схуыдтам «Адæмы Хорзæх». Ирон адæм хуызæр арфæйæн дзæгъæлы нæ фæзæгъынц: «Адæмы хорзæх дæ уæд!»

Уыимæ, хорзæх раттыны фæдыл уынаффæгæнгæйæ, къамис нæ кæсдзæн адæймагæн йæ раздæры хæрзиуджытæ æмæ кадджын нæмттæм, цы бынат ахсы, цас æхца йæм ис, цы кары ис, цы нацийæ у, нæлгоймаг у æви сылгоймаг, æмæ Уагæвæрдмæ бар чин æ дары, æндæр ахæм хъуыддæгтæм. Æппæты сæйрагдæр у – цы хæрзтæ фæцис адæймаг йæ Ирыстонæн ивгъуыд азы.

Фæстаг 2-3 къуырийы дæргъы нæм æрбацыдысты курдиæттæ Иры Стыр Ныхасы æртæ районы хайадæй. Уыдон курынц, цæмæй æркæсæм Черчесты Станиславæн æмæ Гасситы Муратæн уыцы хæрзиуæг раттыны фарстамæ. Нæ къамис ацы сгуыхт адæмы банымадта орден «Адæмы Хорзæх»-ы аггак. Фæлæ Уагæвæрдмæ гæсгæ, кæронбæттæны уынаффæ рахæссынæн, сæ ныхас хъуамæ зæгъой адæм сæхæдæг.

Уый фæдыл сарæзтам мадзæлттæ сæрмагонд Æрфарст саразынæн. Алы районы Ныхасы сæрдæрмæ дæр уыдзæнис хъæлæсгæнæн формæтæ, кæцыты уæ бон у схъæлæс кæнын иуыл, иннæйыл, кæнæ сæ дыууæйыл иумæ. Иры Стыр Ныхасы сайт уын дæтты интернеты хъæлæскæныны фадат дæр.

Хъæлæс кæнæн ис æрмæстдæр 14-æм августы онг.

Уый фæстæ бахынцдзыстæм бæрæггæнæнтæ æмæ уын сæ æнæмæнг фехъусын кæндзыстæм. Æрмæст, уæ хорзæхæй, равдисут уæ раст уд – схъæлæс кæнут æрмæстдæр иу хатт.

        Фиппаинаг: Мыггаг, ном, фыдыном æмæ цæрæнбынат амынд кæм нæ уой, уыцы хъæлæстæ нымад нæ цæудзысты.

Хъæлæс кæнын

 
Наверх

 

Яндекс.Метрика