Æппæтдунеон æхсæнадон змæлд "Иры Стыр Ныхас"-ы Координацион Советы уæнгтæ сæ радон æмбырды æрныхас кодтой, IX съезды цы уынаффæтæ рахастой, уыдон куыд æххæстгонд цæуынц, ууыл æмæ сфидар кодтой 2018 азы куысты иумæйаг пълан, æмхуызонæй йыл схъæлæс кæнгæйæ.

Кучиты Руслан арфæ ракодта, "Стыр Ныхас"-æн районты цы хайадтæ ис, уыдоны сæрдартæн æмæ Комитетты сæргълæуджытæн, ирон æгъдæуттæ æмæ традицитæ бахъахъхъæнынæн, фæсивæды хъомылад æмæ адæмы 'хсæн хæлардзинадыл æмхуызонæй кæй бакуыстой, уый тыххæй.

Кучийы-фырт бахæс кодта, цæмæй дарддæр бакусой ноджы хъазуатондæрæй, уымæн æмæ фæсивæды хъомыладон куыстмæ, карз нозт æмæ наркоманийы фарстатæм фаг хъусдард не 'рцыд. Координацион советы сæргълæууæджы хæдивæгæй æмбырды æвзæрст æрцыд "Ныхас"-ы ирон æвзаг бахъахъхъæныны æмæ ахуырады фарстаты фæдыл комитеты сæрдар Еналдыты Хъазыбег.2

Боны фæткы ма уыд, нæ рагфыдæлты æгъдæуттæй иу, æхсæнадон тæрхон, сног кæныны фарста "Стыр Ныхас"-ы æххуысæй. Уымæ гæсгæ Иры æвзæрст хистæртæ, æнæгъдаудзинад æмæ чъизи митæй йæ бинонтæ, мыггаг, хъæубæстæ, Ирыстоны ном чи худинаг кæны æмæ афтæмæй царды фæтк чи халы, уыцы хицæн адæймæгтæн, Конституци æмæ Паддзахадон закъон æнæ халгæйæ хæсдзысты уынаффæтæ раст фæндагмæ сæ здахыны фæдыл. Зæгъæм, мыггагæн йæ бон у рахæссын æхсæнадон тæрхон худинаггæнæджы иумæйаг бæрæгбæттæм мауал хонын, салам ын мауал дæттынæй.

1

3

4

"Тæрхон"-ы хæс уыдзæн, мыггæгты, хицæн адæймæгты 'хсæн цы хъаугъатæ, быцæутæ рауайа, уыдон æвзарын æмæ сæ фидауын кæнын, сæ монон хъомылад, адæмы 'хсæн хæлардзинад æмæ æнгомдзинадыл кусын. Нæ фыдæлтæ уайдзæфæй рынчын кодтой, фидисæй — мæлгæ. Уæдæ абон, кæд нæхи алантæ хонæм, уæд не 'гъдау, не 'фсарм, нæ алы хъуыддаг дæр æвæрын хъæуы уыцы уагыл. "Стыр Ныхас"-ы куыст æмæ размæвæрд хæсты тыххæй докладтæ скодтой Кучиты Руслан æмæ йæ хæдивæг Зæгъойты Вячеслав.

Координацион советы сæргълæууæг Президиумæн бахæс кодта, цæмæй, Уæрæсе æмæ фæсарæнты цы ирон диаспорæтæ ис, уыдонимæ куыст фенгомдæр кæной. Саразой æппæт мадзæлттæ дæр ирон æвзаг, традицитæ, æгъдæуттæ, ирон лæджы кад æмæ фарн бахъахъхъæнынæн, Республикæйы Хицауад æмæ йæ дæлбар структурæтимæ фембæлдтытæ аразын æмæ æмгуыст кæнынæн. 2018 азы 1 апрельмæ бацæттæ кæнын хъæуы "Мыггæгты Совет"-ы уагæвæрд. Уыдонæн сæ сæйраг хæс уыдзæн кæстæртæн сæ зæрдæты фыдыбæстæмæ уарзондзинад тауын æмæ сæ ирондзинады фæндагмæ здахын. Уыцы æмгъуыдмæ бацæттæ кæнын хъæуы, змæлды разамонджытæн республикæйы хъæуты цæрджытимæ фембæлдтыты пълан. Советтæ цы хъæуты нæй, уыдоны дæр сæ хъæуы саразын æмæ къæпхæнгай архайын.

Мыггæгты комитеты сæрдар Æгкацаты Вячеславы размæ лæууы хæс мыггæгты хистæртимæ куыст фæрæвдздæр кæнын æмæ фæсивæды фарстатæм фылдæр æргом аздахын.

Ирон æгъдæуттæ æмæ культурон цыртдзæвæнтæ хъахъхъæныны фæдыл комитеты сæрдар Моргуаты Эдиславæн бахæс кодтой мæйы æмгъуыдмæ Ирыстоны хъæуты кадджын, æгъдауджын æмæ дзырддзæугæ лæгты иумæ æрбамбырд кæнын æмæ комитеты размæ æвæрд хæстæ æмзиууонæй хъæугæ уагыл æххæст кæнынмæ рахизын. Рахастой уынаффæ змæлд "Стыр Ныхас"-ы бындурыл "Æхсæнадон-консультативон совет" саразын, газет "Стыр Ныхас" мидисджындæр æрмæджытæй фæхъæздыгдæр кæнын, республикæйы дзыллон-хабархæссæг фæрæзты æмæ Интернеты социалон хызæджы "Стыр Ныхас"-ы куыст æвдисын æмæ хъусынгæнинæгтæ мыхуыр кæнын. Координацион советы уæнгтæ æмбырды цы бирæ фарстатыл æрныхас кодтой, уыдон æнæмæнг сты ахсджиаг. Ныхас цыд Дзæуджыхъæуы ирон адæмы иудзинады мæсыг саразыны фæдыл хъуыддаг кæй нæ рæзы, Алханчуртæн йæ ном раивын кæй хъæуы, республикæйы æнæниздзинад хъахъхъæнынады уагдæтты куысты хæрзхъæддзинадмæ цæстдардыл, республикæмæ бацæуæны культурон монумент сæвæрын æмæ бирæ æндæр хъæугæ хъуыддæгтыл.

Уæлдæр ранымад фарстатæй республикæйы цæрджытæ æмæ дзыллон хабархæссæг фæрæзты минæвæртты дæр тынгдæр сцымыдис кодта "Тæрхон"-ы фæзынд абоны "цы мæ фæнды, уый кæнын"-ы царды. Æхсæнадон тæрхон царды ныффидар уыдзæн æви нæ, уый рæстæг равдисдзæн. Иуты фæнды, æмæ зæгъынц, æхсæнадон тæрхон æнæмæнг хъæугæ хъуыддаг кæй у. Иннæтæ, уый фехъусгæйæ, хæрдмæ фесхъиуынц.

ХЕТÆГКАТЫ Оксанæ

Авторы ист къам

 
Наверх

 

Яндекс.Метрика