“Æмзиууонтӕй бакусӕм!"


Æппӕтдунеон ӕхсӕнадон змӕлд "Иры Стыр Ныхас"-ы Координацион советы сӕрдар Кучиты Руслан ирон адӕмы ӕнӕрадон XI съезды раныхасы йӕ размӕ цы хӕстӕ сӕвӕрдта, уыдонӕй иу уыд алы районы хъӕуты цӕрджытимӕ дӕр комкоммӕ фембӕлын ӕмӕ ӕргомӕй ӕрныхас кӕнын, сӕ зӕрдӕ сын цы агайы, уыцы ахсджиаг ӕхсӕнадон фарстатыл.

Цыппӕрӕмы йын Хуымӕллӕджы хъӕуы Культурӕйы хӕдзары бӕстыхайы уыд радон фембӕлд Рахизфарсы районы цӕрджытимӕ. Архайдтой дзы районы администрацийы минӕвӕрттӕ, хъӕуты хистӕртӕ, ахуыргӕнджытӕ, фӕсивӕд, "Стыр Ныхас"-ы ӕмӕ районы ӕндӕр ӕхсӕнадон организациты уӕнгтӕ, уазджытӕ Кировы районӕй. Æмбырд амыдта Рахизфарсы районы "Стыр Ныхас"-ы советы сӕрдар Томайты Савели.

1 1502

Кучиты Руслан арфӕ ракодта фӕрныг фысымтӕн ӕмӕ сӕ базонгӕ кодта, абон "Иры Стыр Ныхас" йӕ размӕ сӕйрагдӕр цы хӕстӕ ӕмӕ фарстатӕ ӕвӕры, уыдонимӕ. ӕмбырд дарддӕр цыд фарст- дзуаппы хуызы. Хатдзӕгтӕ куыд ӕвдисынц, афтӕмӕй абон алы хъӕуы фарстатӕ дӕр сты ӕмхуызон. Хистӕртӕ: Гаджиты Алексей, Дзгойты Сергей ӕмӕ Æккацаты Эльбрусы сагъӕс уыд, абон нӕ национ хӕзнатӕм фаг ӕргом здӕхт кӕй нӕ цӕуы, ууыл. "Национ телеуынынад дӕр нӕм фӕзынд, фӕлӕ дзы фылдӕр уырыссаг ныхас хъусы адӕймаг. Сӕ уӕлӕдарӕс нӕ культурӕмӕ ницы бар дары. Сывӕллӕттӕн дзы иронау фаг ӕрмӕг нӕй ӕмӕ уӕ курӕм, цӕмӕй ууыл бакусат".

Хъуыдыйаг уыд Гусаты Æхсарбеджы ныхас дӕр: — Бирӕ куыстуӕттӕ, совхозтӕ, колхозтӕ куы нал сты, уӕдӕй адӕм кӕм кусой ӕмӕ сӕ бинонты цӕмӕй дарой, уый нал ис ӕмӕ цъысымы бахаудысты. Хъӕуты цӕрджытӕн сӕ 80 проценты сты ӕгуыст, ӕмӕ нӕ фӕсивӕд алырдӕмты ныппырх сты. Фӕстаг рӕстӕг республикӕмӕ кусынмӕ ӕддагӕттӕ хуынд кӕй цӕуынц, суанг хицауады бынӕттӕм дӕр, уый цӕрджыты зӕрдӕмӕ ӕппындӕр нӕ цӕуы: "Цы хъуамӕ сараза хорзӕй Ирыстонӕн ӕрцӕуӕг разамонӕг, бӕрнон кусӕг, не ‘взаг, не 'гъдау, нӕ культурӕ кӕй нӕ хъӕуынц, сӕ бахъахъхъӕныныл йӕ уд кӕмӕн нӕ риссы, уый? Ницы!" Олгинскӕйӕгтӕ разы не сты, зӕххытӕ иутӕ сӕ быны кӕй бакодтой, ӕмӕ дзы иннӕтӕн хай кӕй нал ис, уыимӕ.

Кучиты Руслан куыд загъта, афтӕмӕй "Ныхас"- мӕ арӕхдӕр цӕуынц ацы фарста равзарыны фӕдыл, фӕлӕ иугӕйттӕй хынцгӕ нӕу, хъӕуы йӕ иумӕйагӕй, кӕрӕдзи ӕмбаргӕйӕ лыг кӕнын. "Ныхас"-ы лӕгтӕ мысайнӕгты тыххӕй дзырддаг кӕй систы, уый куыд раст у? "Стыр Ныхас" уымӕ цы цӕстӕй кӕсы, ӕмӕ цы аразы? — Ныхасы уӕнгтӕ мысайнӕгтӕм ӕппындӕр ницы бар дарынц. Растдӕр уаид, ацы фарста, дзуары лӕгтӕй сӕ чи равзӕрста, уыдонмӕ раттын,— загъта Кучийы-фырт ӕмӕ йемӕ иууылдӕр сразы сты.

2 1502

Олгинскӕйыхъӕуккаг Белеккаты Таймуразы курдиат та уыд, цӕмӕй-иу, ирон бӕрӕгбӕтты къӕлиндартӕ чи фӕаразы, уыдон-иу иннӕ хъӕуты хистӕртимӕ дӕр бауынаффӕ кӕной, кӕннод сзыгъуыммӕтӕ сты ӕмӕ сын нӕхӕдӕг куы ницыуал ӕмбарӕм, уӕд нӕ кӕстӕртӕ та цы кӕндзысты, зӕгъгӕ. Уыцы хъуыддаг сӕххӕст кӕнынӕн "Стыр Ныхас"-ы ис ирон ӕгъдӕутты комитет ӕмӕ йыл цӕудзӕн куыст ӕмдыхӕй, алкӕй фиппаинӕгтӕм дӕр байхъусгӕйӕ. Æмбырды архайджыты зӕрдӕмӕ фӕцыд ӕхсӕнадон тӕрхон сног кӕныны фӕндон, цӕмӕй ӕфхӕрд цӕуой, мыггаг, хъӕубӕстӕ ӕгад ӕмӕ худинаг чи кӕны, уыдон.

Хуымӕллӕджы фӕсивӕды разамонӕг Гӕбӕгкаты Вилен радзырдта сӕ иумӕйаг ахастдзинады тыххӕй, абон ирон лӕджы ном къӕхты бын чи кӕны, хъусцӕджытӕ, даргъ дзыккутӕ чи дары, йӕхи гейпарадмӕ чи цӕттӕ кӕны, наркотиктӕ, хъылма ӕмӕ нозт мады 'хсыр кӕмӕн фестадысты, уыдоны тыххӕй ӕмӕ агуырдта дзуапп, цы гӕнгӕ у уыдонӕн, зӕгъгӕ. Хуымӕллӕджы фӕсивӕдӕй зӕрдӕ тынг барад. Æмхуызонӕй базылдысты сӕ кувӕндӕттӕм. Хъӕубӕсты уынгтӕ, ӕрбахизӕнтӕ — иууылдӕр ӕфснайд. Ис сӕм ӕгъдау, хорздзинӕдтӕ аразынмӕ тырнындзинад. Хъӕубӕсты цӕрджыты фӕндӕттӕй иу у, кӕддӕр дзы цы гуыпгӕнгӕ рынчындон уыд, авд азы заууатӕй чи лӕууы, уый куы скусид, уый.

Зӕрондбӕтӕхъойыхъӕуккаг Джериаты Шамилы хатдзӕг рӕстдзӕвины нӕмыгау нысаныл сӕмбӕлд. — Мах фылдӕр не 'ргом аздахын хъӕуы хъомыладон куыстмӕ, не 'взаг, не 'гъдӕуттӕ бахъахъхъӕнӕм ӕмӕ сӕ нӕ кӕстӕртӕм адӕттӕм. Уыдон нӕ къухы куы бафтой, уӕд зӕххыты ӕмӕ иннӕ социалон фарстатӕ лыг кӕнын дӕр ӕнцондӕр уыдзӕн. Ирыстоны алы ирон лӕг дӕр у Ныхасы лӕг ӕмӕ ӕмзиууонтӕй бакусӕм! — загъта Шамил.

Хуымӕллӕджы хъӕуы ног хицау Сӕлбиты Артур ӕмӕ ӕмбырды хистӕртӕ арфӕ ракодтой Кучийы-фыртӕн, рагӕй кӕмӕ бӕллыдысты, уыцы фембӕлд кӕй ӕрцыд ӕмӕ ӕргом кӕй аныхас кодтой, уый тыххӕй.

Хетӕгкаты Оксанӕ
Авторы ист къамтӕ

 
Наверх

 

Яндекс.Метрика